ٹرمپ کی بڑی بڑھک ایران کو ہم ایک رات میں تباہ کر دینگے، ہو سکتا ہے وہ کل کی رات ہو

واشنگٹن سے موصولہ اطلاعات کے مطابق امریکی صدر نے ایک اہم اور انتہائی حساس فوجی آپریشن کی کامیابی کا اعلان کیا ہے، جس کا مقصد ایک لاپتہ امریکی پائلٹ کو بحفاظت واپس لانا تھا۔ امریکی صدر کے دعوے کے مطابق یہ کارروائی ایران کے اندر کی گئی جہاں تقریباً دو سو امریکی فوجیوں نے حصہ لیا۔ آپریشن کے دوران امریکی اہلکار ایرانی حدود میں داخل ہوئے اور شدید مزاحمت و فائرنگ کے باوجود اپنے پائلٹ کو بازیاب کروا کر باحفاظت واپس لے آئے۔ صدر نے بتایا کہ اس پورے مشن میں کسی بھی امریکی جانی نقصان کی اطلاع نہیں ملی، البتہ مشن میں 21 لڑاکا طیاروں نے حصہ لیا اور ایک امریکی ہیلی کاپٹر پر فائرنگ بھی کی گئی۔ آپریشن کے دوران ایک طیارے کو معمولی نقصان پہنچا جسے فوری طور پر فعال کر لیا گیا۔ اپنے بیان میں امریکی صدر نے مزید دعویٰ کیا کہ اس کارروائی کے دوران ایران میں ایک ایف 15 طیارہ مار گرایا گیا، جبکہ ایرانی افواج اپنے زخمی افسر کی تلاش میں مصروف رہیں۔ انہوں نے ایران کو سخت ترین لہجے میں خبردار کرتے ہوئے کہا کہ اگر ضرورت پڑی تو امریکہ ایران کو محض ایک رات میں تباہ کرنے کی صلاحیت رکھتا ہے اور یہ اقدام کسی بھی وقت، یہاں تک کہ کل کی رات بھی ممکن ہو سکتا ہے۔ ایران کی جانب سے پیش کی گئی تجاویز پر ردعمل دیتے ہوئے صدر کا کہنا تھا کہ اگرچہ یہ تجاویز بظاہر بہتر ہیں لیکن انہیں زیادہ اہمیت نہیں دی جا سکتی کیونکہ امریکہ نے اپنے مطلوبہ اہداف حاصل کر لیے ہیں۔ ماہرین کے مطابق اس بیان نے خطے میں پہلے سے موجود کشیدگی کو مزید سنگین بنا دیا ہے جس کے عالمی سطح پر گہرے اثرات مرتب ہو سکتے ہیں۔ رپورٹ: شاہ علی فرزند